بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد پێشوازیکرد لە مارتین یێگەر، باڵیۆزی ئەڵمانیا لە عێراق.
لە دیدارێکدا جەخت لە پەرەپێدانی پەیوەندییەکان و فراوانکردنی هەماهەنگییەکانی نێوان هەردوولا کرایەوە بە تایبەت لە بوارە ئابوری و کەلتوورییەکان و بەردەوامیی هاوکارییەکان بۆ هێزی پێشمەرگەی کوردستان لە چێوەی رێکخستن و یەکخستنەوەی هێزەکەدا.
تێپەڕاندنی ناکۆکییەکانی نێوان هەرێم و عێراق تەوەرێکی تری دیدارەکە بوو و هەردوولا هاوڕابوون چارەسەرێکی گونجاو بۆ کێشەکان بدۆزرێتەوە بە شێوەیەک کە مافی هەموو لایەک پارێزراوبێت.
سەرۆک بافڵ ئاماژەی بە بڕیارە بوێرانەکەی پەرلەمانی ئەڵمانیا کرد بۆ بەجینۆسایدناساندنی کۆمەڵکوژیی خوشک و برا ئێزیدییەکان و وتی، “یەکێتیی نیشتمانیی کوردستان پێشوازی لەم بڕیارە گرنگ و بوێرانەیە دەکات و هیوادارین وڵاتانی تریش هاوشێوەی ئەڵمانیا هەنگاوی لەمشێوەیە بگرنەبەر”.
