سەرۆكی لیژنەی نەوت و وزە لە ئەنجومەنی پارێزگای هەولێر رایدەگەیەنێت، قەیرانی كەمیی غاز لە هەولێر بەردەوامە و تائێستا چارەسەر نەكراوە و دەشڵێت، “ئەگەر ئەو قەیرانە چارەسەرنەكرێت نرخەكەی بەرزتردەبێتەوە”.
بەپێی زانیارییەكانی تۆڕی میدیایی ئێستا، یەك بوتڵ غازی بازرگانی لە شاری هەولێر گەیشتووەتە 19 هەزار دینار و هاوڵاتییان شەوان نۆرەیان بۆ وەرگرتنی غاز گرتووە.
نافز ناوپردانی سەرۆكی لیژنەی نەوت و وزە لە ئەنجومەنی پارێزگای هەولێر لە لێدوانێكدا بە تۆڕی میدیایی ئێستای راگەیاند، قەیرانی كەمیی غاز لە شاری هەولێر بەردەوامە پێویستە وەزارەتی سامانە سروشتییەكان چارەسەری ئەو گرفتە بكات و ئەو بڕە غازەی لە وەرزی هاویندا بۆ هاوڵاتییانی شاری هەولێر دابیندەكرێت هەمان بڕە بۆ وەرزی زستان كە ئەوەش خواست و پێویستیی شاری هەولێر پڕناكاتەوە قەیران دروستدەبێت.
جەختیكردەوە، “ئەگەر قەیرانی غاز لە شاری هەولێر چارەسەرنەكرێت نرخەكەی لەوەی ئێستای كە هەیە بەرزتر دەبێتەوە”.
