رێكخراوێك نیگەرانی لەبارەی حاڵەتەكانی پێشێلكاریی ئازادیی رادەربڕین لە هەرێم دەردەبرێت و رایدەگەیەنێت، بارودۆخەكە پێویستی بە گرتنەبەری هەنگاوی خێرا و كردارییە.
رێكخراوی ئاشتی و ئازادی ئەمڕۆ لە هەولێر راپۆرتێكی لەبارەی پێشێلكارییەكانی پەیوەست بە ئازادیی رادەربڕین و كاری میدیایی لە هەرێم بڵاوكردەوە و رایگەیاند، بارودۆخی ئازادیی رادەربڕین لە هەرێمی كوردستان بەجۆرێكە كە پێویستی بە گرتنەبەری هەنگاوی خێرا و كردارییە لەلایەن دامەزراوەكانی یاسادانان، جێبەجێكردن و دادوەری و لایەنە پەیوەندیدارەكانی دیكە.
رێكخراوەكە كە بارەگا و چالاكییەكانی لە هەولێرە ئاماژەی بەوەشدا، “بە نیگەرانییەوە لە حاڵەتەكانی پێشێلكاریی ئازادیی رادەربڕین بە گشتی و ئازادیی كاری میدیایی بە تایبەت دەڕوانێت”.
هەروەك ئامارێكی لەبارەی پێشێلكارییەكانی ساڵی رابردوو خستەڕوو و ئاشكرایكرد، 250 دۆسیەی پێشێلكارییان دژ بە میدیا و میدیاكاران تۆماركردووە، لەپاڵ ژمارەیەك دۆسیەی دیاریكراو كە دژ بە پەیامنێر و میدیاكاران لە ناوچە كوردستانییەكانی دەرەوەی ئیدارەی هەرێم ئەنجامدراون.
دۆسیەكان 399 پەیامنێر و رۆژنامەنووسی كەناڵەكانی میدیایی دەگرێتەوە، وەك ئەوەی رێكخراوی ئاشتی و ئازادی ئاماژەی پێدا.
روونیشیكردەوە، دۆسیەكان بەمجۆرەن (دەستگیركردن 43 دۆسیە بەرامبەر 72 رۆژنامەنووس، رێگری لە رووماڵی میدیایی 113 دۆسیە بەرامبەر 185 رۆژنامەنووس، شكاندن و گرتنی كەلوپەلی رۆژنامەوانی 38 دۆسیە بەرامبەر 64 رۆژنامەنووس، هەڕەشە و برینداركردن 17 دۆسیە بەرامبەر 31 رۆژنامەنووس).
جگە لە دوو 2 حاڵەتی هەڵكوتانەسەر كەناڵەكانی میدیا، 25 حاڵەتی پێنەدانی زانیاری، 9 هەڕەشە و پێنج حاڵەتی هاككردن و هەڕەشەی ئەلیكترۆنی.
