کیلیان مباپێی فەرەنسی و ئەستێرەی یانەی پاریس سان جێرمان، پەیوەندیی تەلەفۆنی لەگەڵ سەرۆکی وڵاتەکەی ئەنجامداوە و پێی ڕاگەیاندووە، کە پەیوەندی بە یانەی ڕیاڵ مەدریدەوە دەکات.
پۆرتاڵی “دیفێنسا سەنتراڵ”ی ئیسپانی بڵاویکردووەتەوە، لە ماوەی چەند هەفتەی ڕابردوودا پەیوەندیی نێوان مباپێ و ئیمانوێل ماکرۆنی سەرۆکی فەرەنسا بەرەوپێشچوونی بەخۆوە بینیوە.
هاوینی 2021 مباپێ لەسەر داوای سەرۆکی فەرەنسا بڕیاریدا گرێبەستی یانەی ڕیاڵ مەدرید ڕەتبکاتەوە و لە پاریس بەردەوامبێت، ئەم بڕیارەش لە پێناو مۆندیال و بوارە بازرگانییەکان و بابەتی سازکردنی ئۆڵیمپیادی 2024دا بوو، بەڵام پێدەچێت یاریزانەکە ڕا و بۆچوونی گۆڕابێت.
بەپێی سەرچاوەکە، مباپێ پەیوەندی بە ماکرۆنەوە کردووە و پێیوتووە، کە بەڵێنەکەی ناباتەسەر، بەڵکو لە هاوینی 2023 یان 2024 پەیوەندی بە یانەی ڕیاڵ مەدریدەوە دەکات، داواشی لێکردووە لەپێناو بەردەوامبوون لە پاریس فشاری لەسەر دروست نەکات.
