ناسنامەی قوربانییانی رووداوەکەی ئەمڕۆی مێردینی باکووری کوردستان بڵاوکرایەوە، خێزانەکەشیان باس لەوە دەکات کە کوژراون و هیچ دەستکاریی پارەکانیان نەکراوە.
بەیانیی ئەمڕۆ پێنجشەممە لە مێردینی باکووری کوردستان لەلایەن کەسێک یان چەند کەسێکی نەناسراوەوە هێرشی چەکداریی کرایە سەر ئۆتۆمبێلێک کە تابلۆکەی پارێزگای دهۆک بووە و پێنج کەسی خەڵکی دهۆکی تێدابووە.
لە رووداوەکەدا چوار کەسیان کوژراون و گوللـە بەسەریانەوە نراوە، یەکێکیان بە برینداری گەیەنراوەتە نەخۆشخانە.
ناسنامەی قوربانییەکانی رووداوەکە بریتیین لە، هەندرێن عەبدوڵڵا ساڵح (39 ساڵ) و واحیدە حەیدەر جاسم (63 ساڵ) و عەبدوڵڵا ساڵح مستەفا (69 ساڵ)، چیمەن شاهین خالید (75 ساڵ) گیانیان لەدەستداوە و ئەحمەد جەلالەدین ئیبراهیم (45 ساڵ) بریندارە.
تا ئێستا ئەنجامدەرانی هێرشەکە دەستگیرنەکراون و نازانرێت کێن و پاڵنەری تاوانەکە چیبووە.
