بەمەبەستی پاراستنی هاوڵاتییان لە خواردن و خواردنەوەی رێگەپێنەدراو و ناتەندروست، بەڕێوەبەرایەتیی تەندروستیی سلێمانی کەمپینێکی 10 رۆژەیی راگەیاند.
د. سەباح هەورامی بەڕێوەبەریی گشتیی تەندروستیی سلێمانی لە کۆنگرەیەکی رۆژنامەوانیدا رایگەیاند، “وەک دەزانین سلێمانی لە خۆراکی تەندروست و پاکوخاوێن لە پێشی هەموو پارێزگاکانەوە، بۆ هێشتنەوەی بەم شێوەیەش و زیاتر گرنگیدان بەو بابەتە، بەڕێوەبەرایەتیی خۆپاراستنی تەندروستی سلێمانی کەمپینێکی 10 رۆژەیی گەڕان و پشکنینی ئامادەکردووە”.
ئاماژەی بەوەش کرد، “زیاتر لە 320 کارمەندی بەڕێوەبەرایەتیی خۆپاراستنی تەندروستیی و بەڕێوەبەرایەتیی تەندروستیی سلێمانی لە هەڵمەتەکەدا بەشداری دەکەن، بەسەر 107 تیمدا دابەشبوون، کە دوو ئەرکی سەرەکیان هەیە، کە یەکەمیان پشکنینە و ئەوی دیکەشیان هۆشیارکردنەوەیە، ئامانجمان ئەوەیە پشکنین بۆ چوار هەزار شوێنی دروستکردنی خواردن و خواردنەوە بکەین و نموونەی 500 شوێن وەردەگرین و چێکی مۆڵەت و مۆڵەتی کارمەندەکانیان و شوێنەکانیان دەکرێتەوە”.
باسیلەوەشکرد، “هەر لە هەڵمەتەکەدا سەردانی 500 خوێندنگا دەکرێت و خوێندکاران لەبارەی خواردنی رێگەپێدار و تەندروست هۆشیاردەکرێنەوە”.
