وەزارەتی گواستنەوەی فیدراڵی، لەبارەی بومەلەرزەكەی پارێزگای دهۆكەوە روونكردنەوە دەدات و داوا لە هاوڵاتییان دەكات نەكەونەژێر كاریگەریی پڕوپاگەندەوە.
ئەمڕۆ چوارشەممە وەزارەتی گواستنەوەی حكومەتی عێراق راگەیەندراوێكی لەبارەی روودانی بومەلەرزە لە پارێزگای دهۆك بڵاوكردەوە و رایگەیاند، بەرەبەیانیی ئەمڕۆ بووە و گوڕەكەی 3.5 پلە بە پێوەری رێختەر بووە.
بەپێی راگەیەندراوەكە، ناوەندی بومەلەرزەكە لە قەزای ئامێدی بووە و كاتژمێر 06:05:44ـی ئەم بەیانییە روویداوە، بەڵام هاوڵاتییان هەستیان پێنەكردووە.
بەشێك لە بەكارهێنەرانی تۆڕە كۆمەڵایەتییەكان لە عێراق، ئەمڕۆ دەنگۆی ئەوەیان بڵاوكردەوە كە بومەلەرزەیەكی بەهێز شاری دهۆكی هەژاندبێت، روونكردنەوەكەی وەزارەتی گواستنەوە لە وەڵامی ئەو دەنگۆیانەدایە و داوا لە هاوڵاتییان دەكات بە وریاییەوە مامەڵە لەگەڵ زانیارییەكاندا بكەن و نەكەونەژێر كاریگەریی پڕوپاگەندەوە.
