وەزیری دارایی هەرێم چەند بڕیارێکی لەبارەی خانەنشینانی سلێمانی دەرکرد و بەڵێنیدا پێداویستییەکانی بەڕێوەبەرایەتیی خانەنشینی سلێمانی دابینبکات.
ئەمڕۆ پێنجشەممە وەزارەتی دارایی و ئابووری هەرێم بڵاویکردەوە، “لە میانەی سەردانە دوو رۆژەییەکەی بۆ سلێمانی ئاوات شێخ جەناب بڕیاریداوە بینای بەڕێوەبەرایەتیی خانەنشینی سلێمانی بە تەواوی تەرخانبکرێت بۆ خانەنشینیی و کاربکرێت بۆ کارئاسانی مامەڵە و سەردانی خانەنشینان بۆ بەڕێوەبەرایەتییەکە”
ئاماژەی بەوەش کرد، “بڕیاریداوە هەریەک لە بانکی باخان و بانکی کوردسات تێکەڵبکرێن و لە چوارچێوەی یەک بانکدا ئیشوکارەکانیان رێکبخرێتەوە، سەرجەم دۆسییەی خانەنشینان بە دیجیتاڵی بکرێت و شێوازی نوێ لە ئەرشیفکردنی دۆسیە و دیکۆمێنتەکان کارا بکرێت”.
ئاشکراشیکرد، “وەزیری دارایی و ئابووری داوایکردووە بە ئەلیکترۆنیکردنی مووچەی خانەنشینان و دروستکردنی کارتی زیرەکی مووچەکانیان کە وەزارەتی دارایی لە کابینەی نۆیەمی حکومەتی هەرێم دەستیپێکردووە، قۆناغەکانی کاراتر و تەواو بکرێت”.
