ئۆتۆمبێلێك لەسەر رێگەی هەولێر – گەزنە خۆی كێشاوە بە ستوونێكی كارەبادا، بەڕێوەبەرایەتیی هاتوچۆی هەولێر لەبارەی رووداوەكە بە توانجەوە دەڵێت، “شوێنی ستوونی کارەباکە هەڵە نییە”.
بەپێی راگەیەندراوی بەڕێوەبەرایەتیی هاتوچۆی هەولێر، بەیانیی ئەمڕۆ دووشەممە لەسەر رێگەی هەولێر – گەزنە، ئۆتۆمبێلێكی جۆری مازدای تایبەت بەهۆی تیژڕۆیی لە شەقام دەرچووە و خۆی کێشاوە بە ستوونێکی کارەبا لەسەر ناوبڕەی شەقامەکەدا.
لە دەرئەنجامی رووداوەکەدا شوفێری ئۆتۆمبێلەكە بە سەختی برینداربووە و زیانێکی زۆری ماددی بەر ئۆتۆمبێلەکە و ستوونی کارەباکە کەوتووە، وەك هاتوچۆی هەولێر دەڵێت.
راشیگەیاندووە، “لەوانەبوو بە کەمکردنەوەی خێرایی بۆ 60 کم لە کاتژمێرێک و تۆزێک بەئاگایی ئەو کارەساتە نەکەوتبایەتەوە، ئێمە دڵنیاین لەوەی کە شوێنی ستوونی کارەباکە هەڵە نییە”.
