ژنێکی ئیندۆنیزی بەمەبەستی خۆدزینەوە لەو قەرزانەی لەسەری کەڵەکەبووبوو، خۆی کرد بە مردوو و کچەکەی وێنەکانی لە تۆڕە کۆمەڵایەتییەکان بڵاوکردەوە.
چیرۆکی ئەو ژنە ئیندۆنیزییە لەوەوە دەستیپێکرد، بە مەبەستی کڕینی چەند بلیتێکی یانسیب، بڕێک پارەی لە ژنێک قەرزکردبوو و ماوەیەک لەنێوانیان دیاریکرابوو بۆ دانەوەی قەرزەکەی.
ئەو ژنە ئیندۆنیزییە لەو کاتەی بڕیاربوو پارەکەی بداتەوە، هیچ بڕە پارەیەکی لەبەردەستدا نەبوو، هەربۆیە جلی مردووی لەبەرکرد و داوای لە کچەکەی کرد وێنەیەکی بگرێت و لە تۆڕە کۆمەڵایەتییەکان بڵاویبکاتەوە کە مردووە.
کچی ژنە قەرزدارەکە لەگەڵ وێنەکەی دایکی وێنەیەکی دیکەی لە تۆڕە کۆمەڵایەتییەکان بڵاوکردەوە، بۆ ئەوەی وای نیشان بدات، وێنەی دایکییەتی بە مردوویی لە نەخۆشخانە و بەڵام ئەو وێنەیە لە فیلمێکەوە وەرگیرابوو.
بەهۆی ئەو وێنەیەوە هەر زوو درۆی ژنە ئیندۆنیزییەکە ئاشکرابوو و بەڵام تا ئێستا لە دوای ئاشکرابوونی فێڵەکەی نەتوانراوە هیچ زانیارییەکی لەبارەوە بزاندرێت.
