بەڕێوەبەرایەتیی پۆلیسی راپەڕین رایگەیاند، تەرمی پێشمەرگەیەک لەناو شۆفڵێکدا دۆزراوەتەوە و ئاسەواری فیشەکی بە جەستەوەیە.
بەڕێوەبەرایەتیی پۆلیسی راپەڕین ئەمڕۆ شەممە بڵاویکردەوە، “بەرەبەیانی ئەمڕۆ شەممە هێزەکانمان ئاگادارکران بە بوونی حاڵەتێکی کوشتن لە گەڕەکی ڕاپەڕین نزیک گۆڕستانی راپەڕین، پاشان دەرکەوت هاوڵاتییەک بەناوی (ق. م . م) رەگەزی نێر، دانیشتووی قەڵادزێ گەڕەکی (ئیمام قاسم) پیشەی پێشمەرگە لە لیوای 7ی سەر بە وەزارەتی پێشمەرگە تەرمەکەی لەسەر شۆفڵکەی دۆزراوەتەوە”.
ئاماژەی بەوەش کرد، “بەپێی زانیارییە سەرەتاییەکان ئەو هاوڵاتییە شۆفڵی پێبووە ویستوویەتی بچێتە سەرکار، بەڵام بە رێگاوە بە چەکی کڵاشینکۆف دەستڕێژی گولـلـەی لێکراوە و بەو هۆیەشەوە بەسەر شۆفڵەکەیەوە کوژراوە کە شوێنەواری دوو فیشەک بەسەر جەستەیەوە هەیە”.
باسی لەوەشکرد، “دوای رووداوەکە هێزەکانی پۆلیس و ئاسایشی قەڵادزێ گەیشتونەتە شوێنی مەبەست و دوای گرتنەبەری رێوشوێنەکان تەرمەکەیان گواستووەتەوە بۆ نەخۆشخانەی گشتی قەڵادزێ”.
