موحسن مەندەلاوی جێگری یەكەمی سەرۆكی ئەنجومەنی نوێنەرانی عێراق دەڵێت، دەستووری ئێستای عێراق باشترین دەستوورە لەسەر ئاستی وڵاتانی عەرەبی.
ئەمڕۆ هەینی لە بەغداد “كۆنگرەی دەستووری عێراق 2005: هەڵسەنگاندن و بنیادنانی رووانینێكی نوێ” دەستیپێكرد و ماوەی دوو رۆژ دەخایەنێت، بەشداربووان هەڵسەنگاندن بۆ دەستوورەكە و بەند و بڕگەكانی دەكەن.
موحسن مەندەلاوی، جێگری یەكەمی سەرۆكی ئەنجومەنی نوێنەران لەبارەی دەستووری عێراقەوە وتی، “ئەو دەستوورەی لە ساڵی 2005ـدا پەسەندكرا، پێشكەوتووە و لە دەستوورەكانی گشت وڵاتانی عەرەبی باشترە”.
حوسێن عەرەب پەرلەمانتاری سەربەخۆ، وتارەكەی مەندەلاوی لە كۆنگرەكەدا خوێندەوە و رایگەیاند، “دەستوور بە پەسەندكردنی كۆتایی پێنایەت، بەڵكو پرۆسەیەكی بەردەوامی هەمواركردنەوە، سەرباركردن، توێژینەوە و گفتوگۆیە و پێویستە لە ئاست خواستی چالاكوانان، نووسەران، یاساناسان، رووناكبیران و رۆژنامەنووساندا بێت”.
