بەرێوەبەری هاتوچۆی هەرێم رایدەگەیەنێت، ئەو ئۆتۆمبێلانەی تابلۆی بیانین بە شێوەی كاتی هێندراونەتە هەرێمی كوردستان بۆ ماوەیەك مۆڵەتیان پێدراوە و پێویستە بگەڕێندرێنەوە بۆ ئەو وڵاتانەی لێوەی هێندراون، جەختیشدەكاتەوە، “دوای تەواوبوونی ئەو وادەیەی بۆیان دیاریكراوە بكەونە مەفرەزەكانی هاتوچۆوە دەستیان بەسەردا دەگیرێت”.
لیوا عەبدولقادر عەزیز بەڕێوەبەری گشتیی هاتوچۆی هەرێم لە لێدوانێكدا بە تۆڕی میدیایی ئێستای راگەیاند، ئەو ئۆتۆمبێلانەی كە تابلۆی بیانین بە شێوەی كاتی دەهێندرێنە هەرێمی كوردستان كە زۆربەیان بۆ ماوەی مانگێك یاخود شەش مانگ مۆڵەتیان پێدراوە و دوای تەواوبوونی ئەو وادەیە دەبێت ببرێنەوە بۆ ئەو وڵاتانەی لێوەی هێندراون.
ئاماژەی بۆ ئەوەش كرد، “هێنانی مۆدێلی ئەو ئۆتۆمبێلانە بۆ هەرێمی كوردستان گونجاو نییە بۆیە دەبێت دوای تەواوبوونی وادەكەی ببرێنەوە ئەو وڵاتەی لێوەی هێندراون و ئەگەر خاوەنەكەی پابەندی رێنماییەكان نەبێت كاتێك كە دەكەونە مەفرەزەكانی هاتوچۆوە دەستیان بەسەردا دەگیرێت”.
