وەزارەتی ئاوەدانكردنەوە و نیشتەجێكردنی هەرێم روونكردنەوە لەبارەی كردنەوەی تونێلی دەربەندیخان دەدات و دەڵێت، “تونێلی دەربەندیخان لەلایەن كەسوكاری قوربانییانی رووداوەكانی هاتوچۆ لە سنوورەكە دەكرێتەوە”.
پەرلەمانتارێك ئاماژەی بۆ ئەوە كردبوو، كە تونێلی دەربەندیخان كاری نۆژەنكردنەوەكەی تەواوبووە و لەبەر قردێلەكە ناكرێتەوە.
هەر لەو بارەیەوە و لە راگەیەندراوێكدا وەزارەتی ئاوەدانكردنەوە و نیشتەجێكردن دەڵێت، “ھەندێك كەس و لایەن بۆ موزایەدە كردن و خۆدەرخستن، زانیاری ناڕاستییان لەبارەی تونێلی دەربەندیخانەوە بڵاوكردووەتەوە، لێرەوە بە هەموو لایەكی رادەگەیەنین سەرەڕای ئەوەی زۆربەی كارەكانی نۆژەنكردنەوەی تونێلی دەربەندیخان تەواوبووە، بەڵام هێشتا كاركردن لەناو تونێلەكە بەردەوامە و دوای تەواوبوونی كارەكان لە یەك دوو رۆژی داهاتوودا بە ڕووی شۆفێران و هاوڵاتییاندا دەكرێتەوە”.
لە راگەیەندراوەكەدا هاتووە، وەزیری ئاوەدانكردنەوە و نیشتەجێكردن قائیمقامی دەربەندیخانی راسپاردووە، بە بەخشینی رێوڕەسمی كردنەوەی تونێلی دەربەندیخان بە كەسوكاری قوربانییانی رووداوەكانی هاتوچۆ لە سنوورەكە، ئەمەش وەك رێز و وەفایەك بۆ گیانی قوربانییانی رووداوەكانی هاتوچۆ و كەسوكاری قوربانییەكان.
ئاماژە بۆ ئەوەش كراوە، وەك ئەو بەڵێنەی وەزیری ئاوەدانكردنەوەو نیشتەجێكردن بە كەسوكاری قوربانییان و خەڵكی سنوورەكەی داوە كە ئەوەی لە توانایاندا بێت بۆ خزمەتكردنی سنوورەكە درێغی ناكەن و خزمەتكردنی سەرجەم هاونیشتیمانییان بە ئەرك دەزانن.
