بەڕێوەبەری گشتی پلاندانان لە وەزارەتی خوێندنی باڵا رایگەیاند، نووسراومان ئاڕاستەی وەزارەتی دارایی و ئەنجومەنی وەزیران کردووە بۆ دابەشکردنی دەرماڵەی خوێندکاران چاوەڕیی وەڵامی ئەوانین.
د. خەتاب ئەحمەد بەڕێوەبەری گشتی پلاندانان لە وەزارەتی خوێندنی باڵا و توێژینەوەی زانستی بە تۆڕی میدیایی ئێستای راگەیاند، “سەبارەت بە دابەشکردنی دەرماڵەی خوێندکارانی زانکۆ و پەیمانگەکان نووسراومان ئاراستەی وەزارەتی دارایی و ئەنجومەنی وەزیران کردووە چاوەڕێی وەڵامی ئەوانین”.
وتیشی، “رەشنووسی یاسای دەرماڵە لە وەزارەت ئامادەکراوە و رەوانەی ئەنجومەنی وەزیران کراوە، لە ئێستادا لیژنەیەک پێکهێنراوە بۆ ئەوەی پێداچوونەوەی بۆ بکرێت و رەوانەی پەرلەمان بکرێت بۆ ئەوەی ببێتە یاسا”.
باسی لەوەش کرد، “وەزارەت بەردەوام دەبێت لە هەوڵەکانی بۆ خەرجکردنی دەرماڵەی خوێندکاران، بەڵام سەبارەت بە ناردنی 200 ملیارەکە ئەوە کاری وەزارەتی داراییە و ئەوان بڕیاردەدەن لە چیدا خەرجی بکەن”.
