سیراج بارزانی سەرۆکی ئەنجومەنی گشتیی ڕاژە دەڵێت، حکومەت هەوڵدەدات دەرگای دامەزراندن بكرێتەوە و ساڵانە بەشێك لە دەرچووان دابمەزرێندرێن.
سیراج بارزانی سەرۆکی ئەنجومەنی گشتیی ڕاژەی حكومەتی هەرێمی كوردستان رایگەیاند، پێداچوونەوە بە میلاک و ڕاژەی فەرمانبەراندا دەكرێت و ئەنجومەنی گشتیی ڕاژە بۆ ئەو مەبەستە دامەزراوە و وتی، “دووبارە دابەشكردنەوە بۆ ڕاژەی فەرمانبەران بەپێی پسپۆڕی دەكەین، ئەویش بە ڕاوێژ لەگەڵ فەرمانبەران، لە هەموو دامودەزگاكان و سێكتەرەكان ژمارەی فیعلیی فەرمانبەران دەستنیشاندەكەین، بەڵام فەرمانبەران دڵنیادەكەینەوە كە گواستنەوەیان بە ڕاوێژ دەبێت”.
سەرۆکی ئەنجومەنی گشتیی ڕاژە جەختیكردەوە كە “كابینەی نۆیەم زۆر گرنگیی بە كەمكردنەوەی خەرجییەكان و زیادكردنی داهات داوە، بۆ ئەوەی بتوانێت دووبارە دەرگای دامەزراندن بكاتەوە و ساڵانە ئەگەر ژمارەیەكی ڕەمزییش بێت، بەشێك لە دەرچووان دابمەزرێنێت، بە جۆرێك بارقورسیی لەسەر حكومەت دروستنەكات”.
