ئیدارەی ئەمریکا بەنیازە شاندێکی پلە باڵا ڕەوانەی چین بکات، ئەمەش یەکەم هەنگاوە لەدوای ئەو بەڵێنەی مانگی ڕابردوو لە بالی لەلایەن شی جین پینگ سەرۆکی چین و جۆ بایدن سەرۆکی ئەمریکاوە بۆ پەرەپێدانی پەیوەندییەکانی نێوان هەردوو وڵاتەکەیان درابوو.
شاندە ئەمریکییەکە دەچێتە چین، کۆریای باشوور و ژاپۆن بە سەرۆکایەتی یاریدەدەری وەزیری دەرەوە بۆ کاروباری ڕۆژهەڵاتی ئاسیا و زەریای هێمن دانیال کرێتنبرینکۆ و بەڕێوەبەری باڵای کاروباری ئەنجومەنی ئاسایشی نیشتمانی بۆ کاروباری چین و تایوان لۆرا ڕۆزنبێرگەر.
بایدن و شی پێشتر بەڵێنیان دابوو کە “بەردەوام بن لە بەڕێوەبردنی کێبڕکێی نێوان هەردوو وڵات بە شێوەیەکی بەرپرسیارانە و گەڕان بەدوای بوارەکانی هاوکاریکردنی یەکتر”.
بایدن و شی بە تایبەتی باسیان لە پرسە ناکۆکەکانی نێوانیان کرد، لەنێویاندا سنووردارکردنی ئەمریکا بۆ هاوردەکردنی بەرهەمە تەکنەلۆژییە چینییەکان و فراوانکردنی کاریگەرییەکانی چین.
