پارێزگاری سلێمانی ڕایدەگەیەنێت، پشتیوانیی له داوا ڕه‌واكانی خه‌ڵكی كوردستان و داكۆكیی له چاره‌سه‌ركردنی قه‌یران و كێشه درێژخایه‌نه‌كان ده‌كه‌ین و دەشڵێت، دۆخی سه‌ختی سیاسیی و حكومڕانیی وڵاته‌كه‌مان؛ پێویستی به لێكتێگه‌یشتن و یه‌كڕیزیی میلله‌ته‌كه‌مان هه‌یه.
هەڤاڵ ئەبوبەكر، پارێزگاری سلێمانی ئەمڕۆ دووشەممە 7ی كانونی یەكەم لە بڵاوكراوەیەكدا دەڵێت، وه‌ك هه‌میشه؛ پشتیوانیی له داوا ڕه‌واكانی خه‌ڵكی كوردستان و داكۆكیی له چاره‌سه‌ركردنی قه‌یران و كێشه كه‌ڵه‌كه‌بوو تاقه‌تپڕوكێن و درێژخایه‌نه‌كان و، ئازادیی ڕاده‌ربڕین و مێدیاو چالاكیی و ناڕه‌زایه‌تیده‌ربڕین و خۆپیشاندانی هێمنانه و مه‌ده‌نیانه و، دوركه‌وتنه‌وه له به‌ریه‌ككه‌وتن و توندوتیژیی و، پێداگریی له ته‌جریمكردنی شه‌ڕی یه‌كتریی و ته‌حریمكردنی یه‌كترسڕینه‌وه؛ ده‌كه‌ین.
هەڤاڵ ئەبوبەكر لە پەیجی خۆی نوسیویشیەتی، “ده‌ستبردن بۆ شكۆ و ژیان و ژینگه و كار و كه‌سابه‌ت و بژێویی و موچه و كاسه و گیرفان و ده‌ره‌تانی هاووڵاتیان؛ به ناڕه‌وا ده‌زانین”.
پارێزگاری سلێمانی ئاماژە بەوەشدەكات، متمانه و پشتیوانیی ئێوه‌ی جوامێر؛ ئه‌رك و به‌رپرسیارێتیی ئێمه‌ی له گۆشه‌ی هێزێكی سیاسییه‌وه بۆ پانتایی حكومڕانیی شیاو و ئیداره‌دانی پارێزگایه‌كی زیندوو گۆڕیوه، له‌م دۆخه ئاڵۆز و ناجێگیر و پڕ له قه‌یران و كێشانه‌دا؛ به پشتیوانیی هه‌مووتان “مۆدێلێكی مه‌ده‌نیانه‌ی خزمه‌تگوزارانه‌ی حكومڕانیمان” بنیاتناوه.
جەختیشدەكاتەوە، له‌گه‌ڵ ئازادیی ڕاده‌ربڕین و ڕاگه‌یاندنین، هه‌موو هه‌وڵه‌كانی ئێمه بۆ چه‌سپاندنی سه‌قامگیریی و هاوڵاتیی سه‌نته‌ریی و گێڕانه‌وه‌ی متمانه‌یه بۆ دامه‌زراوه‌كانی ده‌وڵه‌ت.
هەڤاڵ ئەبوبەكر دەشڵێت، دۆخی سه‌ختی سیاسیی و حكومڕانیی و ئابوریی و دارایی و ته‌ندروستیی و كۆمه‌ڵایه‌تیی وڵاته‌كه‌مان؛ پێویستی به لێكتێگه‌یشتن و به‌یه‌كگه‌یشتن و كاری هاوبه‌ش و یه‌كڕیزیی میلله‌ته‌كه‌مان هه‌یه، پێویستی به گیانی به‌رزی لێبوردن و به‌یه‌كه‌وه‌هه‌ڵكردن و هاوئامانجیی و یه‌كترقبوڵكردن و دیالۆگ و، هه‌ڵگرتنی به‌رپرسیارێتیی قۆناغه‌كه هه‌یه.
