بەڕێوەبەرایەتیی گشتیی كەشناسی و بومەلەرزەزانیی هەرێم، بڕی بارانبارینی 12 كاتژمێری رابردووی بڵاوكردەوە و ئاشكرایدەكات، “ئەمشەو هەندێكجار ئاستی بارانبارین دەگۆڕێت بۆ بارانی بە لێزمە و هەورەتریشقە بە تایبەت لە ناوچە شاخاوییەكانی پارێزگای هەولێر و سلێمانی”.
بەپێی راگەیاندراوێكی بەڕێوەبەرایەتیی گشتیی كەشناسی و بومەلەرزەزانیی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە،” كەشی ئێستای هەرێمی كوردستان بە گشتیی ئاسمان هەوری تەواو و باراناوییە لە زۆربەی ناوچەكان بارانبارینی پچڕپچڕ و لێزمە دەبارێت”.
لە راگەیەندراوەكەدا هاتووە، “پێشبینیدەكرێت بۆ ئەمشەو بارانبارین بە شێوەی نمەباران و بارانی مامناوەند بە پچڕپچڕی بەردەوام بێت و هەندێكجار ئاستی بارانبارین دەگۆڕێت بۆ بارانی بە لێزمە و هەورەتریشقە بە تایبەت لە ناوچە شاخاوییەكانی پارێزگای هەولێر و سلێمانی و لە زۆربەی ناوچەكانی پارێزگای دهۆك ئەگەری بارانبارین زیاترە”.
