سەرۆكی لیژنەی دارایی لە پەرلەمانی كوردستان رایدەگەیەنێت، بڕیارەكەی حكومەتی عێراق بۆ لابردنی باجی سەر كارتی مۆبایل هەرێمی كوردستانیش دەگرێتەوە و جەختیشدەكاتەوە، بەپێی بڕیارەكە كارتی مۆبایل كە ئێستا نرخەكەی 6 هەزار دینارە كەمدەكرێتەوە بۆ 5 پێنج هەزار دینار.
لە كۆبوونەوەی ئەمڕۆی ئەنجومەنی وەزیرانی عێراق بڕیاردرا لە سەرەتای مانگی داهاتووەوە باجی 20٪ی سەر كارتی مۆبایل و ئینتەرنێت هەڵبگیرێت و بۆ ئەو مەبەستەش دەستەی ڕاگەیاندن و پەیوەندییەكانی عێراق بۆ جێبەجێكردنی ئەو بڕیارە ڕاسپێردران.
زیاد جەبار سەرۆكی لیژنەی دارایی لە پەرلەمانی كوردستان لە لێدوانێكدا بە تۆڕی میدیایی ئێستای ڕاگەیاند، پێشتر كە بڕیاری دانانی باج بە ڕێژەی 20% درا كۆمپانیاكانی پەیوەندیكردن باجەكەیان خستە سەر هاوڵاتییان و كارتی مۆبایل گرانكرا و بەوەش نرخی كارتی مۆبایل لە 5 هەزار دینارەوە زیادكرا بۆ 6 هەزار دینار و كارتێكی 10 هەزار دیناری نرخەكەی كراوەتە 12 هەزار دینار.
سەرۆكی لیژنەی دارایی جەختیكردەوە، ئەو بڕیارە لە عێراق جێبەجێبكرێت هەرێمی كوردستان دەگرێتەوە و ئەو كارتەی ئێستا بە 6 هەزار دینار دەدرێتە هاوڵاتییان نرخەكەی دەكرێتەوە بە 5 هەزار دینار و كارتی 12 هەزار دیناری دەكرێتەوە بە 10 هەزار دینار.
