ئەنجومەنی نوێنەرانی عێراق كۆدەبێتەوە و خوێندنەوە بۆ پێنج پڕۆژەیاسا دەکات.
بڕیارە كاتژمێر 11ی پێش نیوەڕۆی ئەمڕۆ دووشەممە ئەنجومەنی نوێنەرانی عێراق كۆببێتەوە و بەپێی كارنامەی كۆبوونەوەكە، خوێندنەوەی یەکەم بۆ پڕۆژەیاسای پەیوەندیکردنی عێراق بە سیستمی بنەڕەتیی کۆنگرەی لاهای بۆ یاسای نێودەوڵەتیی تایبەت دەكرێت، لەگەڵ خوێندنەوەی یەکەم بۆ پڕۆژەیاسای پەسەندکردنی رێککەوتنی هاوكاریی نێوان عێراق و رێکخراوی نەتەوە یەکگرتووەکان بۆ گەشەپێدانی پیشەسازی.
تەوەرێكی تری كۆبوونەوەی ئەمڕۆی ئەنجومەنی نوێنەران وەك كارنامەكە ئاشكرایكردووە، خوێندنەوەی یەکەم دەبێت بۆ پڕۆژەیاسای “تاوانی دیجیتاڵی” و خوێندنەوەی دووەم بۆ پڕۆژەیاسای هەمواری سێیەمی یاسای کۆلێژی ئیمام ئەعزەم، لەگەڵ خوێندنەوەی دووەم بۆ پڕۆژەیاسای رێکخستنی کرێی خزمەتگوزاری لە فەرمانگەکانی دەوڵەت.
