ئەندامێكی لیژنەی وزە و سەرچاوە سروشتییەكان لە پەرلەمانی كوردستان رایدەگەیەنێت، راكێشانی بۆریی غاز بۆ ماڵان هاوشێوەی پڕۆژەی راكێشانی هێڵی شەمەندەفەرەكە دەبێت و لەم كابینەیەدا جێبەجێناكرێت، هاوكات چەند زانیارییەكیش لەبارەی قەیرانی كەمیی غاز و مەترسیی بەرزبوونەوەی نرخەكەی ئاشكرادەكات.
سەركۆ ئازاد ئەندامی لیژنەی وزە و سەرچاوە سروشتییەكان لە پەرلەمانی كوردستان لە لێدوانێكدا بە تۆڕی میدیایی ئێستای راگەیاند، راكێشانی بۆریی غاز بۆ ماڵان پڕۆژەیەكە كە پێناچێت لەم كابینەیەدا جێبەجێبكرێت و هاوشێوەی راكێشانی هێڵی شەمەندەفەرەكە جێبەجێناكرێت، چونكە ئێستا قەیرانی كەمیی غاز هەیە و ساڵانە لەم كاتەدا قەیرانی غاز دروستدەكرێت و دواتر نرخەكەی لەسەر هاوڵاتییان بەرزدەكرێتەوە.
ئاماژەی بۆ ئەوەش كرد، پێشتر نرخی یەك بوتڵ غاز شەش هەزار دیناربوو كرا بە 7250 دینار و دواتر نرخەكەی لەسەر هاوڵاتییان زیادكرا و ئێستا یەك بوتڵ غاز بە 8500 دینار دەفرۆشرێت.
ئاشكرایكرد، هەوڵێك هەیە كە دەیانەوێت غاز لەسەر هاوڵاتییان گران بكەن كە سەرەتا قەیرانی كەمیی غاز سەرهەڵدەدات و دواتر گراندەكرێت و ئەگەر حكومەت دەیەوێت خزمەتی هاوڵاتییان بكات پێویستە قەیرانی كەمیی غاز چارەسەر بكرێت و دواتر بیر لە راكێشانی بۆریی غاز بۆ ماڵان بكاتەوە.
