لیژنەیەكی تایبەت چاودێریی سەرجەم هۆتێلەكانی شاری سلێمانی دەكات و هەر خاوەن هۆتێلێك ڕێگا بە مانەوەی ئەو خێزان و منداڵانە بدات كە كاری نەشیاو یاخود دەرۆزە دەكەن سزای یاسایی دەدرێن.
بەپێی راگەیەندراوێكی قائیمقامیەتی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە میانی سەردانكردنی لیژنە هاوبەشەكانی قائیمقامیەتی سلێمانی كە لە نوێنەری منداڵپارێز و بەڕێوەبەرایەتیی كار و پۆلیسی نەوجەوانان پێكهاتوون بۆ هۆتێل و شوێنەكانی مانەوە لە سلێمانی، ئاسۆ ئەحمەد- توێژەر لە ڕێكخراوی منداڵپارێزی كوردستان و سەرۆكی لیژنەی پاراستنی منداڵ ڕایانگەیاند، بەردەوام سەردانی هۆتێلەكان دەكەن بۆ ئەوەی دڵنیاببنەوە لەوەی كە منداڵی ئیشكەر و دەرۆزەكەر لە هۆتێلەكاندا نەمێننەوە، كە زۆربەیان لە ناوچە و پارێزگاكانی دەرەوەی سلێمانییەوە هاتوون و سەربەخۆ یاخود لەلایەن خێزانەكانیانەوە كاری جۆراوجۆریان پێدەكرێت.
لە راگەیەندراوەكەدا هاتووە، سەرباری كاری ڕۆژانەی لیژنەكان بۆ لای ترافیك و شەقام و شوێنەكانی كاركردن و كاری شەوانەیان هۆتێلەكانیش بەسەردەكەنەوە، بە هەماهەنگی پۆلیسی نەوجەوانان و سەرپەرشتیاری كار لە بەڕێوەبەرایەتیی كار سەردانی كافتریا و بازاڕەكان دەكەن و ڕێگانادەن كار بە هیچ منداڵێك بكەن و هیچ منداڵێكیش سەردانی ئەو شوێنانە بكەن”.
