محەمەد شیاع سودانی سەرۆك وەزیرانی عێراق، دەزگای هەواڵگریی خستەژێر سەرپەرشتیی راستەوخۆی خۆیەوە.
ئەمڕۆ یەكشەممە محەمەد شیاع سودانی سەرۆك وەزیرانی عێراق، بڕیاری دا دەزگای هەواڵگریی نیشتمانی فەرمان لە خوودی سەرۆك وەزیرانەوە وەربگرێت و راستەوخۆ خۆی سەرپەرشتیی دەزگاكەكە بكات.
بڕیارەكەی سودانی دوای سەردانەكەی ئێوارەی ئەمڕۆی بۆ دەزگای هەواڵگریی نیشتمانی و كۆبوونەوەی لەگەڵ كاربەدەستانی دەزگاكەدا دێت.
بەشێك لە میدیای عێراقی و چاودێران دەڵێن، هۆكاری بڕیارەكەی سودانی، ناكۆكییە لەبارەی بەڕێوەبردنی دەزگای هەواڵگریی نیشتمانی، چونكە لایەنە شیعییەكان هاودەنگ نین لەسەر دیاریكردنی كەسێك بۆ بەڕێوەبردنی ئەو پۆستە، بۆیە سەرۆك وەزیران بڕیاریداوە بە شێوەیەكی كاتی خوودی خۆی سەرپەرشتیی دەزگای هەواڵگریی نیشتمانی بكات.
