شێخ جەعفەر شێخ مستەفا پاڵپشتیی تەواوی بۆ سەرجەم کار و چالاکییەکانی دژەتیرۆر دەربڕی و ڕایگەیاند، “دژەتیرۆر دەستێکی پۆڵایین بووە بۆ لەناوبردنی داعش و ئەو مەترسییانەی لەسەر هەرێمی کوردستان دروستبوون”.
ئەمڕۆ دووشەممە شێخ جەعفەر شێخ مستەفا جێگری سەرۆکی هەرێمی کوردستان سەردانی بارەگای بەڕێوەبەرایەتیی گشتیی دژەتیرۆری کرد و لەگەڵ وەهاب هەڵەبجەیی بەرێوەبەری گشتیی دژەتیرۆر کۆبووەوە.
لە کۆبوونەوەکەدا باس لە هەنگاو و پلانەکانی داهاتووی هێزەکانی دژەتیرۆر بۆ ڕووبەڕووبوونەوەی پاشماوەکانی داعش و هەماهەنگیی زیاتری نێوان هێزەکانی دژەتیرۆر و پێشمەرگە و سوپای عێراق کرا، بەمەبەستی کۆنترۆڵکردنی ئەو سنوورانەی کە بوونەتە هۆکار بۆ حەشارگەی تیرۆرستانی داعش”.
شێخ جەعفەر شێخ مستەفا جێگری سەرۆکی هەرێمی کوردستان، پاڵپشتیی تەواوی خۆی بۆ هەموو کار و چالاکییەکانی هێزەکانی دژەتیرۆر دەربڕی و ڕایگەیاند،”دژەتیرۆر دەستێکی پۆڵایین بووە بۆ لەناوبردنی داعش و ئەو مەترسییانەی لەسەر هەرێمی کوردستان دروستبووە”.
وتیشی، “وەک ھەمیشە ھاوکاردەبین بۆ سەرخستنی کارەکانتان و ھەموو ھەوڵێکیشمان روو لە پاراستنی ئارامی و ئاسایشی ھەرێمی کوردستانە”.
