حكومەتی سعودیە، فرۆشتنی خواردنەوە كحولییەكان لە فڕۆكەخانەكانی وڵاتەكەیدا تاوتوێدەكات.
بەپێی هەواڵێكی رۆژنامەی “ئەرابیەن بزنس”، كاربەدەستانی سعودیە تاوتوێی بڕیارێك دەكەن بۆ رێگەدان بە فرۆشتنی خواردنەوە كحولییەكان لە بازاڕە ئازادەكانی فڕۆكەخانەكانی سعودیەدا.
سەرەتا هەوڵدەدرێت مەی تەنها بەو گەشتیارانە بفرۆشرێت كە بە شێوەی ترانزێت فڕۆكەخانەكانی سعودیە بەكاردەهێنن و گەشتی نێودەوڵەتی دەكەن وەك رۆژنامەكە ئاشكرایكردووە و دەڵێت، “تا ئێستا بڕیار لەو بارەیەوە نەدراوە و تەنها پرسەكە تاوتوێدەكرێت”.
پێشتر میدیای جیهانی بڵاویكردبووەوە، حكومەتی سعودیە دەیەوێت رێگەبدات بە فرۆشتنی خواردنەوەی كحولی لە ناوچە گەشتیارییەكانی سەر دەریا، لەوانە ئەو هاوینەهەوارانەی لە رۆخی دەریای سووردان و بەپێی پلانەكە، چەندین مەیفرۆشی دەكرێنەوە بۆ فرۆشتنی جۆرە جیاوازەكانی مەی.
