وتەبێژی بەڕێوەبەرایەتیی هاتوچۆی هەولێر ڕایدەگەیەنێت، یاسای هاتوچۆ لە هەرێمی كوردستان دەگۆڕدرێت و هەندێك لەو سزایانەی پێشتر لەسەر شۆفێران توندتردەكرێن.
ڕائید فازڵ حاجی وتەبێژی بەڕێوەبەرایەتیی هاتوچۆی هەولێر لە لێدوانێكدا بە تۆڕی میدیایی ئێستای ڕاگەیاند، لە پەرلەمانی كوردستانەوە یاسای نوێی هاتوچۆ دەگۆڕدرێت و لە ئێستادا ئەو پڕۆژەیاسایەی تایبەتە بە هاتوچۆ خوێندنەوەی یەكەمی بۆ كراوە و یاسای ژمارە 86ی كە تایبەتە بە هاتوچۆ نامێنێت و لە عێراقیش ئێستا كار بەو یاسایە ناكرێت و یاسای ژمارە 1ی ساڵی 2019 كاری پێدەكرێت.
ئاماژەی بۆ ئەوەش كرد، لە هەرێمی كوردستان یاسای نوێی هاتوچۆ دەگۆڕدرێت هەندێك لە سزاكان لەسەر شۆفێران بەپێی ئەو یاسا نوێیەی ئامادەدەكرێت تونددەكرێن و لە عێراقیش هەمان میكانیزم پەیڕەوكراوە بە جۆرێك كە سزای تیژڕەوی لە 40 هەزار دینارەوە كراوەتە 250 هەزار دینار.
