کاردەکرێت بۆ ئەوەی لە کەمترین ماوەدا نەخۆشخانەیەك لە سلێمانی بۆ پاراستنی ئەو كچ و ژنانەی بێلانەن و نەخۆشی دەروونیان هەیە بکرێتەوە، وەك ئەوەی تەندروستیی سلێمانی ئاماژەی پێداوە.
بەڕێوەبەرایەتیی گشتیی تەندروستیی سلێمانی رایگەیاند، بڕیارە لەناو نەخۆشخانەی سۆزی دەروونی بینایەکی نوێ بخرێتە خزمەت ئەو کچ و ژنانەی بێلانەن و نەخۆشیی دەروونیان هەیە تا لەژێر چاودێریی پزیشکیدا بن و چارەسەریان بۆ بکرێت.
ئاماژەشیدا، بۆ ئەو مەبەستە رۆژی سێشەممە هەریەك لە فوئاد سدیق راوێژكاری وەزارەتی كار و كاروباری كۆمەڵایەتی، سەباح هەورامی بەڕێوەبەری گشتیی تەندروستیی سلێمانی، ئیسماعیل رەشید بەڕێوبەری گشتیی چاودێری و گەشەپێدانی كۆمەڵایەتیی سلێمانی، بێستون جەبار نوێنەری وەزیری كار و كاروباری كۆمەڵایەتی و رووناك فەرەج خێرخوازی دیاری سلێمانی بینای نەخۆشخانەكەیان بەسەركردەوە.
پاش بەسەركردنەوەی هۆڵ و بەشە جیاجیاكانی بیناكە، بڕیاردرا پەلەبكرێت لە دابینكردنی پێداویستییەكان تا لە نزیكترین كاتدا ئەو نەخۆشخانەیە بكرێتەوە.
نەخۆشخانەكە بە هەماهەنگیی بەڕێوبەرایەتیی گشتیی چاودێری و گەشەپێدانی كۆمەڵایەتی و بەڕێوبەرایەتی گشتیی تەندروستیی سلێمانی بەڕێوەدەبرێت.
