نوێنەری نەتەوە یەكگرتووەكان داوای گەڕاندنەوەی پارە دزراوەكانی عێراق دەكات و پشتگیریی لێكۆڵینەوە لەو كەیسەدا دەكات.
جینین هێنیس پلاسخارت، نوێنەری تایبەتی ئەمینداری گشتیی نەتەوە یەكگرتووەكان بۆ عێراق رایگەیاند، عێراق بە پارە دزراوەکانی کە چەندین ملیار دۆلارە دەتوانێت وەبەرهێنان لە قوتابخانە، نەخۆشخانە، بواری وزە، ئاو، رێگاوبان و هی دیكەشدا بكات.
پلاسخارت دەشڵێت، “ئەو پارانە بگێڕنەوە و بیدەنەوە دەست خاوەنی راستەقینەی خۆیان”.
هەروەك داوای پشتگیری لە حکومەتی عێراق دەكات لە لێكۆڵینەوە و لێپێچینەوەكانیدا لەو دۆسیەیەدا.
عیراق دەتوانێت چی بە پارە دزراوەکانی بکات کە چەندین ملیار دۆلارە؟ بۆ قوتابخانە و نەخۆشخانە و وزە و ئاو و ڕێگاو و ئی تریش. ئەو پارانە بگەڕێنەوە بۆ خاوەنی راستەقینەی خۆیان. پشتگیری لە حکومەتی عێراق لە لێکۆڵینەوە و لێپێچینەوە. #TheftOfTaxDeposits
— Jeanine Hennis (@JeanineHennis) October 17, 2022
پەیامەكە لەكاتێكدایە پێنجشەممەی رابردوو ئیحسان عەبدولجەبار وەزیری پێشووی دارایی بە وەكالەت دزرانی 3.7 تریلیۆن دیناری لە داهاتی عێراق ئاشكراكرد و وتی، “كۆمەڵێك كەسی دیاریكراو، بڕی 3.7 تریلیۆن دینار (2.5 ملیار دۆلار)یان لە پارەی باج لەناو بانكی رافیدەین دزیوە”.
دواتریش دەستەی دەستپاكیی عێراق لە روونكردنەوەیەكدا رایگەیاند، دۆسیەكە لێكۆڵینەوەی تیاكراوە و لەئێستادا خراوەتە بەردەم دادگا.
لە ئایاری ساڵی رابردووشدا بەرهەم ساڵح، سەرۆک کۆماری ئەوكاتی عێراق پرۆژەیاسای گێڕانەوەی پارە و سامانە دزراو و بە تاڵانبراوەکانی عێراقی بۆ دەرەوەی وڵات، ئاڕاستەی پەرلەمان کرد و لە وتارێکی ڤیدیۆییدا رایگەیاند، لە ساڵی 2003وە عێراق هەزار ملیار دۆلار (یەك ترلیۆن دۆلار)ی بەهۆی گەندەڵییەوە لەدەستداوە، هەروەها 150 ملیار دۆلاریش لە گرێبەستە گەندەڵییەکاندا براوەتە دەرەوە.
بەرهەم ساڵح داوایكردبوو هاوپەیمانێتییەکی نێودەوڵەتی دابمەزرێنرێت بۆ ڕوبەڕوبوونەوەی گەندەڵی، هاوشێوەی هاوپەیمانێتیی دژی داعش.
