بافڵ جەلال تاڵەبانی سەرۆکی یەکێتیی نیشتمانیی کوردستان تیمی پارێزەرانی ڕاسپاردووە بۆ ئازادکردنی هەردوو ڕۆژنامەنووس سەرتیپ وەیسی و ئیبراهیم عەلی، ڕایگەیاندووە، “سلێمانی شوێنێک نییە بۆ زیندانیکردنی ڕۆژنامەنووسان”.
لە ڕاگەیەندراوێ نوسینگەی بافڵ جەلال تاڵەبانی سەرۆکی یەکێتیی نیشتمانیی کوردستاندا هاتووە، “بافڵ جەلال تاڵەبانی تیمی پارێزەرانی تایبەتی خۆی ڕاسپاردووە لە چوارچێوەی یاسا بەرکارەکان کار بۆ ئازادکردنی هەردوو ڕۆژنامەنووس ئیبراهیم عەلی و سەرتیپ وەیسی بکەن بە کەفالەت تاوەکو ئەوکاتەی دۆسیەکە رێڕەوی یاسایی خۆی وەردەگرێت و دادگا بڕیاری خۆی دەدات”.
سەرۆک بافڵ جەلال تاڵەبانی ڕایگەیاندووە، “سلێمانی شوێنێک نییە بۆ زیندانیکردن و ئازاردانی ڕۆژنامەنووس و نووسەران، بەڵکو پایتەختی ڕۆشنبیری جێگەیەکە بۆ ڕێزگرتن لە ڕەخنە و ئازادییەکانی ڕۆژنامەنووسان و خاوەن قەڵەمە ئازا و بوێرەکان”.
