کۆمپانیای دانە گاز ڕاگەیەندراوێکی لەبارەی هێرشە مووشەکییەکانی شەوی ڕابردووی سەر کێڵگەی غازی کۆرمۆر لە چەمچەماڵ بڵاوکردەوە، ڕایگەیاندووە، “بەرهەمهێنان بەردەوامە”.
کۆمپانیاکە ڕایگەیاندووە، “شەوی ڕابردوو چەند مووشەكێك لە دەوروبەری كێڵگەی كۆرمۆر كەوتوونەتە خوارەوە، بەبێ ئەوەی زیانی لێبكەوێتەوە”.
کۆمپانیاکە جەختیکردووەتەوە کە “پرۆسەی بەرهەمهێنان بە شێوەیەکی ئاسایی بەبێ پچڕان بەردەوامە”.
شەوی ڕابردوو ژمارەیەک مووشەكی جۆری گراد لە گوندی كۆكسەوە لە باشووری ناحیەی توزخورماتوو ئاڕاستەی کێڵگەی كۆرمۆر كرا.
ئەمە لەکاتێکدایە كێڵگەی غازی كۆرمۆر لە چەمچەماڵ لە مانگی حوزەیرانی ساڵی ڕابردوودا كەوتە بەر هێرشی مووشەكی و سێ جار لەسەر یەك لە ماوەی چوار ڕۆژدا بۆردومانکرا.
