وەزارەتی كاروباری شەهیدان ڕایدەگەیەنێت، پێشنیارێكیان لەبارەی لێخۆشبوون لە كەسوكاری شەهیدان و ئەنفالكراوان و بەركەوتووانی كیمیایی لە گەڕاندنەوەی بەخشین (مینحە) لەلایەن ئەنجومەنی وەزیرانەوە پەسەندكراوە.
وەزارەتی کاروباری شەهیدان و ئەنفالکراوان ڕایگەیاند، بڕگەی سێیەمی کارنامەی کۆبوونەوەی ئەمڕۆی ئەنجومەنی وەزیرانی حکومەتی هەرێمی کوردستان تایبەت بوو بە خستنەڕووی پێشنیاری وەزارەتەكەیان سەبارەت بە لێخۆشبوون لە كەسوكاری شەهیدان و ئەنفالكراوان و بەركەوتووانی چەكی كیمیاویی بۆ گەڕاندنەوەی ئەو بەخشینانەی (مینحە) وەریانگرتووە لە دوای بەركاربوونی یاسای ژمارە 2ی ساڵی 2020.
ڕوونیشیكردەوە، ئەنجومەنی وەزیران بە كۆی دەنگ پێشنیارەكەی وەزارەتی كاروباری شەهیدانی پەسەندكرد و وەزارەتی دارایی و ئابوری ڕاسپارد بە جێبەجێكردنی پێشنیارەكە و بەدەركردنیان لە ڕێنمایی دارایی لەم بارەیەوە.
