هاوژین عومەر، شارەزای سیاسی و هەڵبژاردن و كادری پێشكەوتووی كۆمەڵی دادگەریی كوردستان لە لێدوانێكدا بە تۆڕی میدیایی ئێستای ڕاگەیاند، وەكو ئەوەی پێشبینیی دەكرا و لەسەر داوای 180 پەرلەمانتار، محەمەد حەلبووسی سەرۆكی ئەنجومەنی نوێنەرانی عێراق ڕۆژی پێنجشەممەی داھاتووی دیاریی كرد بۆ كۆبوونەوەی ھەڵبژاردنی سەرۆك كۆمار و ڕایگەیاند، بە پێی ماددەی 70 لە دەستووری عێراق، ڕێژەی یاسایی بۆ كۆبوونەوەی ئەنجومەنی نوێنەران تایبەت بە هەڵبژاردنی سەرۆك كۆمار بە 220 ئەندام، واتە دوو لەسەر سێی تەواوی ئەندامانی ئەنجومەنی نوێنەران تەواو دەبێت.
هاوژین عومەر پێیوایە، “تا ئێستا د.بەرھەم ساڵح زۆرترین چانسی بردنەوەی ھەڵبژاردنەكەی ھەیە بۆ جاری دووەم و پەسەندكراوی زۆرینەی لایەن و پەرلەمانتارەكانی عێراقە و لە دەرەوەی پەرلەمانیش، موقتەدا سەدر و ڕەوتەكەی ڕەزامەندن لەسەر جارێكی دیكە بە ھەڵبژاردنەوەی د. بەرھەم ساڵح بە سەرۆك كۆمار و نیوەی سوننەكانیش مسۆگەركراون و ھیچ گرفتێك لەو بارەیەوە نابینن، بەڵام پێدەچێت سەرنج و گرفتیان لەسەر ڕاسپاردنی محەمەد شیاع سودانی بۆ پێكهێنانی حكومەتی نوێی عێراق ھەبێت “.
