بزوتنەوەی ئیسلامیی كوردستان لە ڕێگەی وتەبێژەكەیەوە، نیگەرانیی خۆی لە جیابوونەوەی باڵی كامیلی حاجی عەلی دەربڕی و ڕایگەیاند، لە كۆنگرە سەركەوتنیان بەدەستنەهێناوە و ڕێكاری یاساییان بەرامبەر دەگرنەبەر.
دوێنێ یەكشەممە، باڵی كامیلی حاجی عەلی لە بزوتنەوەی ئیسلامیی كوردستان جیابوونەوە و لەگەڵ بزاڤی چاكسازی و گەشە-دا كە محەمەد بازیانی ڕێكخەرە گشتییەكەی بوو، یەكیانگرت و حزبێكی نوێیان بە هەمان ناوی بزوتنەوەی ئیسلامییەوە دامەزراند.
لە كاردانەوەی ئەو جیابوونەوەیەدا، عەبدوڵڵا وەرتی، وتەبێژی بزوتنەوەی ئیسلامیی كوردستان ئەمڕۆ دووشەممە لە كۆنگرەیەكی ڕۆژنامەوانیدا ڕایگەیاند، “لە كاتێكدا كۆمەڵگەكەمان ڕووبەڕووی شاڵاوێكی فیكری و بەدڕەوشتی بووەتەوە، چەند كەسێك كە نەیانتوانیوە متمانەی كۆنگرەی 12 بەدەستبهێنن و بە دەستلەملانێ لەگەڵ كەسانێكدا كە لە مێژووی بزوتنەوەدا هەمیشە سەرقاڵی ململانێ و دووبەرەكی بوون لەناو ڕیزەكانی بزوتنەوەدا، جارێكی تر هەوڵی لێكترازان و دووبەرەكییان دا لەناو ڕیزەكانی بزوتنەوەی ئیسلامیدا”.
ڕۆژی پێنجی شوباتی 2022 كۆنگرەی 12ـیەمینی بزوتنەوەی ئیسلامی بەڕێوەچوو، كامیلی حاجی عەلی تاكە كاندیدی پۆستی ڕابەری بزوتنەوە بوو، بەڵام سەركەوتنی لە كۆنگرە بەدەستنەهێنا و عیرفان عەلی عەبدولعەزیز كە پێشتر دەستیلەكاركێشابووەوە، بە ڕابەری بزوتنەوە هەڵبژێردرایەوە، دوو ڕۆژ دواتر كامیلی حاجی عەلی، بزوتنەوەی بە دەستكاریكردنی دەنگەكانی كۆنگرە تۆمەتباركرد و داوای لە عیرفان عەلی عەبدولعەزیز كرد دەستلەكاربكێشێتەوە بەو پێیەی پێشتر دوو جار ڕابەری گشتیی حزبەكە بووە و بەپێی پەیڕەوی ناوخۆ، مافی بوون بە ڕابەری بۆ سێیەم خوول نییە، بەڵام گوێ لە داواكەی نەگیرا و ئەوەش ناڕەزایی باڵی كامیلی حاجی عەلیی لێكەوتەوە و سەریكێشا بۆ جیابوونەوە و دروستكردنی حزبێكی نوێ.
وتەبێژی بزوتنەوەی ئیسلامی لەو بارەیەوە دەڵێت، “بۆشایی یاساییمان هەبوو، كاندیدی پۆستی ڕابەری گشتی نەیتوانی 51%ی دەنگەكانی كۆنگرە بەدەستبهێنێت، بۆیە مامۆستا عیرفان عەلی عەبدولعەزیز بووەتەوە بە ڕابەری بزوتنەوە”.
عەبدوڵڵا وەرتی جەختیكردەوە كە كۆنگرەی بزوتنەوە لە ڕووی شەرعی و یاساییەوە قبوڵكراوە و كۆتاییهاتووە و ڕایگەیاند، “ئەوانەی بە بزوتنەوەی ئیسلامی ڕازینین، خۆیان ڕێگەكەیان هەڵبژاردووە”.
وتەبێژی بزوتنەوە ئاشكراشیكرد، ئەنجومەنی سەركردایەتیی بزوتنەوەی ئیسلامی هەموو ڕێكارێكی یاسایی دەگرێتەبەر بۆ پاراستنی شكۆ و ناوەندێتیی بزوتنەوەی ئیسلامیی كوردستان و وتی، “دادگا یەكلاییكردووەتەوە كە كۆنگرەی بزوتنەوە شەرعی بووە و ڕابەری بزوتنەوە ڕابەری شەرعیی بزوتنەوەی ئیسلامییە”.
