بافڵ جەلال تاڵەبانی سەرۆکی یەکێتیی نیشتمانیی کوردستان، پەیامێكی هاوخەمیی بۆ كەسوكاری ئەو پێنج پێشمەرگەیەی ئەمڕۆ لەسەر ڕێگای دەربەندیخان – شارەزوور بە ڕووداوی هاتوچۆ گیانیان لەدەستدا نارد و دەڵێت، “خۆم بە هاوبەشی خەمتان دەزانم”.
لە پەیامەكەیدا سەرۆكی یەکێتیی نیشتمانیی کوردستان ڕایگەیاندووە، “دڵتەنگ و نیگەرانم بە گیانلەدەستدانی پێنج پێشمەرگەی قارەمان (تاهیر كاكەوڵا خەلیفە، سەروەر ئەنوەر مەحموود، ئەردەڵان جەمال مەجید، توانا نەسرەدین و جەمال جەلال) کە ئەمڕۆ لە کاتی گەڕانەوە لە ئەرکەکەیان، لە ڕووداوێکی هاتوچۆدا گیانیان سپارد”.
بافڵ جەلال تاڵەبانی نووسیویەتی، “بۆ ئەم لەدەستدانە گەورەیە، پرسە و هاوخەمیی قووڵی خۆم ئاراستەی بنەماڵە، هاوسەنگەر، هاوڕێیان و دانیشتووانی سەیدسادق دەکەم و خۆم بە هاوبەشی خەمیان دەزانم”.
هەروەها دەڵێت، “لە خوای گەورە داواکارم ڕۆحی ئەو پێشمەرگە قارەمانانە شادبکات و سەبووری و ئارامی بە هەموولایەک ببەخشێت”.
