لەمیانەی بەڕێوەچوونی کۆبوونەوەکانی خولی 77 ی کۆمەڵەی گشتی نەتەوەیەکگرتووەکان دیپلۆماتکارێکی عێراقی سەیری یاری تۆپی پێ دەکات و وەزارەتی دەرەوەش لەو بارەیەوە هاتەدەنگ.
ئەحمەد سەحاف، وتەبێژی وەزارەتی دەرەوەی عێراق، لە ڕاگەیەندراوێکدا بڵاویکردووەتەوە، ” وەزارەتی دەرەوە لێکۆڵینەوە لەو وێنەیە دەکات کە بڵاوبووەتەوە و تێیدا دەردەکەوێت دیپلۆماتکارێکی عێراقی لە میانەی بەڕێوەچوونی کۆبوونەوەکانی خولی 77 ی نەتەوە یەکگرتووەکان لە ڕێگەی کۆمپیوتەرەکەیەوە سەیری یاری تۆپی پێ دەکات”.
هەر لە ڕاگەیەندراوەکەدا هاتووە، ” وەزارەتەکە ڕێوشوێنی یاسایی تایبەت دەگرێتە بەر تایبەت بە دیپلۆماتکارەکە”.
مستەفا کازمی، سەرۆک وەزیرانی عێراق، هەفتەی ڕابردوو بە سەرۆکایەتی وەفدێک بەمەبەستی بەشداریکردن لە کۆبوونەوەی کۆمەڵەی گشتی نەتەوە یەکگرتووەکان گەیشتە نیویۆرک.
