سەركردەیەكی بزوتنەوەی حەماس دەڵێت، بەردەوامبوونی ئیسرائیل لە دەستدرێژییەكانی، شەڕێكی گەورە هەڵدەگیرسێنێت كە دەبێتەهۆی لەناوبردنی ئیسرائیل.
مەحمود زەهار یەكێكە لە سەركردەكانی بزوتنەوەی حەماسی فەڵەستینی، باسی دۆخی فەڵەستین و پێكدادانی گرووپە چەكدارەكان و سوپای ئیسرائیلی بۆ میدیای عەرەبی كردووە و ڕایگەیاندووە، “ئەوەی لە قودس ڕوودەدات و زیاتربوونی دەستدرێژی و ڕەفتاری دوژمنكارانەی ئیسرائیل، ئامانج لێی سڕینەوەی شوناسی ئیسلامییانەی قودس و دواتر دابەشكردنیەتی”.
بەپێی وتەی زەهار، “ئیسرائیل هەرچی ڕێككەوتن و پەیماننامەی نێونەتەوەیی هەن پێشێلیكردوون و بەردەوامە لە پێشێلكارییەكان لە قودس، پلانێك جێبەجێدەكرێت كە ساڵی 2018 داڕێژراوە بە مەبەستی زیاتر پێشڕەویكردن و فراوانخوازی لە قودس”.
ئەو سەركردەیەی بزوتنەوەی حەماس دەڵێت، بەردەوامبوونی ئیسرائیل لە دەستدرێژی و دوژمنكاری، “دەبێتەهۆی هەڵگیرسانی شەڕێكی گەورە كە لەناوبردنی خوودی ئیسرائیلی لێدەكەوێتەوە”.
