ئاسایشی سلێمانی دەستگیركردنی 16 كەسی بە تۆمەتی بازرگانیكردن و بەكارهێنانی ماددەی هۆشبەرەوە ڕاگەیاند.
بەپێی ڕاگەیەندراوێكی بەڕێوەبەرایەتیی ئاسایشی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە درێژەی هەڵمەتی هێزەكانمان لە بەڕێوەبەرایەتی ئاسایشی ڕۆژئاوای سلێمانی بۆ ڕێگریكردن لە بڵاوبوونەوە و بازرگانیكردن و بەكارهێنانی ماددەی هۆشبەر، بە بڕیاری دادوەری دادگەی لێكۆڵینەوە لە سنووری بەڕێوەبەرایەتیمان 16 تۆمەتبار لەلایەن هێزەكانمانەوە دەستگیركران”.
لە ڕاگەیەندراوەكەدا هاتووە، تۆمەتبارەكان دانیشتووی شار و شارۆچكە جیاوازەكانی عێراق و هەرێمی كوردستانن.
ئاماژە بۆ ئەوەش كراوە، پێنج لە تۆمەتبارەكان بازرگانن و ئەوانەی دیكە بەكارهێنەری ماددەی هۆشبەر بوون و لە ئێستادا سەرجەمیان بە بڕیاری دادوەر بەپێی ماددەكانی 26 – 30 لە یاسای بەرەنگاربوونەوەی ماددە هۆشبەر و كارتێكەرەكان دەستگیركراون.
