لە پێناو ئاسانکاریکردن بۆ هاوڵاتییان لە كاتی دانەوەی قەرزی كارەبادا، بڕیارێکی نوێ دەركرا و هاوڵاتییانی سنووری ئیدارەی سۆران دەگرێتەوە.
بەپێی بڕیارەكەی بەڕێوەبەرایەتیی كارەبای سۆران، هاوڵاتی دەتوانێت تەنها پارەی ئەم مانگەی كارەبا بدات و دەڵێت، “ئاگاداری گشت هاوبەشانی کارەبا دەکەینەوە ئەوانەی قەرزی کارەبایان لە ئەستۆدایە، دەتوانن پارەی کارەبای خۆیان بدەن تەنها ئەوەی ئێستا بۆیان هاتووە، واتە ئەم مانگە چەندیان بۆ هاتووە دەتوانن ئەوەندە بدەن”.
لە ڕاگەیەندراوێكدا كە ئەمڕۆ یەكشەممە بڵاویكردەوە، بەڕێوەبەرایەتیی كارەبای سۆران ڕایگەیاندووە، ئەو هاوڵاتییانەی باری داراییان باشە، داوایان لێكراوە قەرزی پێشووش بدەنەوە بۆ ئەوەی قەرزەكانیان کەمبنەوە و نەبنە بارگرانی بۆیان.
بڕیارەكەی ئەمڕۆی بەڕێوەبەرایەتیی كارەبای سۆران دوای ئەوە دێت پێشتر بەڕێوەبەرایەتییەكە ڕایگەیاندبوو، هەر هاوبەشێك قەرزی كارەبا نەدات كارەباكەی دەبڕدرێت.
