شارەوانیی سلێمانی ڕایدەگەیەنێت، ھە‌ڵمە‌تی لابردن و لێكردنە‌وە‌ی ڕیكلامی نایاسایی دەستیپێكرد و دەڵێـت، ” ئەو ڕیكلامانە بوونەتە هۆی تێكدانی سیمای جوانی شارەكە.”
بەپێی ڕاگەیەندراوێكی سەرۆكایەتیی شارەوانیی كە وێنەیەكی دەست تۆڕی میدیایی ئێستا كەوتووە و تێیدا هاتووە، لەبەردەوامیی كار و چالاكییەكانی سەرۆكایەتیی شارەوانیی سلێمانی ھە‌ڵمە‌تی لابردن و لێكردنە‌وە‌ی ڕیكلامی نایاسایی لەلایەن بە‌شی لابردنی سە‌رپێچی و زیادە‌ڕۆیيەوە بە ھاوكاریی بە‌شی پۆلیسی شارە‌وانی دەستیپێكرد.
لە ڕاگەیەندراوەكەدا هاتووە، “ھە‌ڵمە‌تێك بە مە‌بە‌ستی لێكردنە‌وە‌ی ڕیكلامی نایاسایی بە‌شێك لە خاوە‌ن كارگە و پێشانگەكان و كاسبكاران لە شە‌قام و دیواری ڕاگرەكان و ستوونی كارە‌با دەستیپێكردووە كە بۆ بە‌رژە‌وە‌ندیی خۆیان بەكارهێناوە و ڕیكلامیان بە زیادە‌ڕۆیی لەسەر موڵكی گشتی داناوە و دە‌بێتە ھۆی تێكدانی سیمای جوانی شارە‌كە‌مان”.
ئاماژە بۆ ئەوەش كراوە، “ھە‌ڵمە‌تە‌كە سە‌رجە‌م شوێنە گشتییە‌كانی شاری سلێمانی دەگرێتەوە”.
