چوار تیرۆریستی داعش لە كەناراوەكانی دەریاچەی حەمرین كوژران و چەندین كەرەستە لەناوبراون، لەوانە بەرمیلی پڕ لە تەقەمەنی.
شانەی ڕاگەیاندنی ئەمنیی عێراق دەڵێت، فڕۆكەی جەنگی سەر بە هێزی ئاسمانیی عێراق، پێگەی چەكدارانی داعشیان بۆردومانكردووە و سێ چەكدار كە خۆیان لە مۆڵگەیەكی كەناراوەكانی دەریاچەی حەمرین حەشاردابوو كوژراون.
بەپێی ڕاگەیەندراوی شانەی ڕاگەیاندنی ئەمنی، هاوكاتی بۆردومانەكە كە بە فڕۆكەی ئێف 16 كراوە، هێزێكی هاوبەشی ئاژانسی هەواڵگری و فەرماندەیی ئۆپەراسیۆنە هاوبەشەكان چوونەتە شوێنی بۆردومانەكە و چەكداری چوارەم ڕووبەڕوویان بووەتەوە و كوژراوە، كە هەمان ئەو چەكدارە بووە كە لە ماوەی ڕابردوودا بەڕێوەبەری پاسپۆرتی ئەعزەمییەی بەغدادی سەربڕیبوو.
شانەی ڕاگەیاندنی ئەمنی ئاشكرایكردووە، بەهۆی بۆردومانەكەوە سێ ماتۆڕسكیل تێكشكاون و دەستگیراوە بەسەر چەندین بۆمب و بەرمیلی پڕ لە تەقەمەنیدا.
