سەرچاوە سەربازییەکانی ئێران بڵاویانکردەوە، وڵاتەکەیان ئاستی ئامادەکارییەکانی بۆ ڕووبەڕووبوونەوەی هێرشی دەرەکی بەرزکردووەتەوە و شار و ناچەکانی لەڕووی سەربازییەوە ئامادەکردووە.
مەهدی فەرەحی جێگری وەزیری بەرگریی ئێران بە میدیاکانی وڵاتەکەی وتووە، هێزەکانی بەرگریی وڵاتەکەی دەتوانێت ئەو هەڕەشە و هێرشانە دیاریبکات کە دەکرێنە سەر وڵاتەکەی و بە درێژایی کات کاردەکەن و هەڕەشەکان بەپێی جۆرەکانیان ئاشکرادەکەن.
فەرەحی دەڵێت، ئەم ڕۆژانە ململانێی توند و ئاڵۆز بەخۆوەدەبینن، جۆرە جیاوازەکانی جەنگ ڕوودەدەن وەک، هێرشی ئەلیکترۆنی، دەکرێت هەندێک وڵات بە هێرشی بایۆلۆژی ئێران بکەنە ئامانج.
هەروەها قادر ڕەحیم زادە فەرماندەی بارەگای بەرگریی ئاسمانیی ئێران ڕایگەیاند، هێزەکانیان لە باشترین حاڵەتی ئامادەییدان.
ئێران هەریەکە لە ئیسرائیل و ئەمریکا بە هێرش بۆ سەر وڵاتەکەی تۆمەتباردەکات، هەروەها ئیسرائیل بە هێرشکردنە سەر وێستگە ئەتۆمییەکانی تۆمەتباردەکات و ئیسرائیلیش تا ئێستا نە پشتڕاستی کردووەتەوە و نە ڕەتیکردووەتەوە.
ئاڵۆزییەکانی نێوان ئێران و ئەمریکاش ڕەگوڕیشەیەکی کۆنی هەیە، لە نوێترین ناکۆکیدا ئێران دوو کەشتیی ئەمریکای دەستبەسەرداگرت و بە مەترسی بۆ سەر وڵاتەکەی ناویبرد.
