مستەفا كازمی جارێكی دیكە سەركردەی لایەنە سیاسییەكانی عێراقی بانگێشتكردووە بۆ كۆبوونەوە لە ڕۆژی دووشەممەی داهاتوو بە مەبەستی لێكنزیككردنەوەی لایەنەكان و چارەسەركردنی كێشە هەڵپەسێردراوەكان.
میدیاكانی عێراق ئەمڕۆ شەممە، بڵاویانكردووەتەوە، مستەفا كازمی سەرۆك وەزیرانی عێراق، سەركردەی لایەنە سیاسییەكانی عێراقی بۆ كۆشكی حكومەت بانگێشتكردووە بە مەبەستی ئەنجامدانی كۆبوونەوەیەك لەسەر دۆخی عێراق، كە كۆبوونەوەكە لە ڕۆژی دووشەممە 5ی ئەیلولی 2022 ئەنجامبدرێـت.
ئاماژە بۆ ئەوەش كراوە، دەستپێشخەرییەكەی كازمی بۆ كۆتاییهێنانە بە ناكۆكی لایەنە سیاسییەكان و دۆزینەوەی نەخشە ڕێگەیەكی گونجاو بۆ دەربازبوونی وڵات لە قەیرانەكان.
لە ناوەڕاستی مانگی ڕابردوودا، بە ئامادەبوونی هەر سێ سەرۆكایەتییەكەی عێراق و سەركردەی لایەنە سیاسییەكانی عێراق، بە میوانداریی مستەفا كازمی لە كۆشكی حكومەت كۆبوونەوەیەك بەڕێوەچوو.
