نزیكەی 660 كیلۆگرام ماددەی كۆكاین كە لە كارتۆنی مۆزدا حەشاردرابوو، لەلایەن پۆلیسی ویلایەتێكی ئەڵمانیاوە دەستی بەسەرداگیرا.
پۆلیسی ویلایەتی براندنبۆگ-ی ئەڵمانی ڕایگەیاند، یەكێك لە بازرگانەكان كە كاری دابینكردنی سەوزە و میوە بۆ كۆگا بازرگانییەكانی ناوچەكە ئەنجامدەدات، بۆ پۆلیسی ئاشكراكردووە لەكاتی بەتاڵكردنی بارێكی مۆزدا هەندێك كیسی بەدیكردووە كە “ماددەیەكی سپی” تیابووە.
پۆلیس ڕوونیكردەوە، پاش پشكنینی كیمیایی دەركەوتووە ماددە گومانلێكراوەكە كۆكاین-ە، ئاماژەی بەوەشكرد، نرخی كۆی ماددەكە بە 50 ملیۆن یۆرۆ دەخەمڵێندرێت.
بەپێی لێكۆڵینەوە سەرەتاییەكان ئەو ماددە هۆشبەرە لە كۆڵۆمبیاوە گەیشتووەتە ئەڵمانیا، بارهەڵگرەكە بە هەڵە ڕادەستی بازرگانەكەی سەوزە و میوە كراوە.
پۆلیسی ویلایەتەكە دووپاتیكردەوە، درێژە بە لێكۆڵینەوەكانی لەبارەی ئەو ڕووداوەوە دەدات.
