بەڕێوەبەرایەتیی هاتوچۆی سلێمانی بڵاویكردووەتەوە، مۆڵەتی نوێی شوفێری و سیستمی دیجیتاڵی لە تەواوی هەرێمی كوردستاندا جێبەجێدەكرێت و سەرجەم شۆفێران دەبنە خاوەنی ئەو مۆڵەتە.
بەپێی ڕاگەیەندراوێكی بەڕێوەبەرایەتیی هاتوچۆی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە چەند پەیجێك لێدوانێكی شێواو بە ناوی وتەبێژی بەڕێوەبەرایەتییەكەمان دەربارەی مۆڵەتی نوێی شوفێری و سیستمی دیجیتاڵی بڵاوكراوەتەوە كە سەرلەبەری ئەو لێدوان و هەواڵانە ڕەتدەكەینەوە و بە هەموو لایەكی ڕادەگەیەنین كە ئەمە سیستمێكی سەرتاسەرییە لە هەرێمی كوردستاندا.
لە ڕاگەیەندراوەكەدا هاتووە، “وەزارەتی ناوخۆ سیستمی نوێی مۆڵەتی شۆفێری لە هەموو پارێزگا و ئیدارە سەربەخۆكان وەك یەك جێبەجێدەكات و هاونیشتیمانییان دەبنە خاوەنی ئەو مۆڵەتە”.
ئاماژە بەوەش كراوە، “ئێمە لە بەڕێوەبەرایەتیی هاتوچۆی پارێزگای سلێمانی لە قۆناغەكانی كۆتایی ئامادەكاری ئەو پرۆسەیەداین و لە ئاییندەیەكی زۆر نزیك لێرە و لە بەڕێوەبەرایەتییەكانی دیكە جێبەجێدەكرێن و سەرجەم شۆفێران دەبنە خاوەنی ئەو مۆڵەتە نوێیە”.
