سەرۆكایەتیی شارەوانی سلێمانی ڕایدەگەیەنێت، لە پێناو سەلامەتی و پاراستنی هاوڵاتییانی شارەكە دەستكرا بە كۆكردنەوەی سەگی بێلانە و گواستنەوەیان بۆ پەناگەكەی سەر ڕێگەی سلێمانی-عەربەت.
بەپێی ڕاگەیەندراوێكی سەرۆكایەتیی شارەوانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، “بە هاوكاریی بەڕێوەبەرایەتیی پۆلیسی سلێمانی و بەڕێوەبەرایەتیی ڤێتێرنەری سلێمانی، هەروەك لە بڕیاری ئەنجومەنی شارەوانیدا ئاماژەی پێدرابوو بە ژمارە 38 كە لە 17ی ئازاری 2022دا بە پێی ڕێكارە یاساییەكان و لەسەر داوا و سكاڵای هاوڵاتییان و لەپێناو پاراستن و سەلامەتیی هاوڵاتییانی شارەكەمان دووبارە دەستكرایەوە بە كۆكردنەوەی سەگی بێلانە”.
لە ڕاگەیەندراوەكەدا هاتووە، “دوای كۆكردنەوەی سەگە بێلانەكان دەگوازرێنەوە، بۆ پەناگەكەی ڕێگەی ”سلێمانی-عەربەت” بەپێی پلانێكی بۆ داڕێژراو قۆناغ بە قۆناغ”.
