سەرۆكی پێشووی زانكۆیەكی حكومی و یاریدەدەرەكەی و 22 ڕاگری كۆلێژ دەبرێنە بەردەم دەستەی دەستپاكی و لێپێچینەوەیان لەگەڵدا دەكرێت.
دەستەی دەستپاكیی عێراق ئەمڕۆ چوارشەممە ئاشكرایكرد، دادگای لێكۆڵینەوەكانی سەڵاحەدین كە تایبەتمەندە بە دۆسیەكانی دەستپاكی، بڕیاریداوە سەرۆكی پێشووی زانكۆی تكریت و یاریدەدەری پێشووی بۆ كاروباری كارگێڕی لێكۆڵینەوەیان لەگەڵدا بكرێت.
دەستەی دەستپاكی بەبێ ئەوەی ناوەكانیان ئاشكرابكات ڕایگەیاند، 22 ڕاگری ئێستا و پێشووی كۆلێژەكانی زانكۆی تكریت بانگدەكرێن بۆ لێپێچینەوە و وتی، “تۆمەتبارن بە سەرپێچیكردنی ڕێنمایی و ڕێكارەكان كە لە بڕیاری ژمارە 315ی ساڵی 2019ی ئەنجومەنی وەزیراندا هاتبوون و تایبەت بوون بە كاركردنی فەرمانبەرانی گرێبەست و كرێی ڕۆژانە و وانەبێژان”.
لە ڕاگەیەندراوێكدا دەستەی دەستپاكیی عێراق جەختیكردەوە، “دادگای لێكۆڵینەوەكانی سەڵاحەدین بەپێی حوكمەكانی ماددەی 331 لە یاسای سزادانی عێراقی بڕیاری بردنەبەردەم دادگای بۆ ئەو كەسانە دەركردووە”.
