ئەمڕۆ چوارشەممە، گۆڕینی سیستمی مۆڵەتی شۆفێری لە هەرێمی كوردستان خرایە بواری جێبەجێكردنەوە. بەپێی سیستمە تازەكە، 12 جۆر مۆڵەتی شۆفێری دەدرێن بە شۆفێرانی هەرێمی كوردستان ئەوەش بەپێی جۆری سوارڕۆكە و چەند مەرجێكی دیكە دیاریكراوە.
سیستمە نوێیەكەی مۆڵەتی شۆفێری بە بڕیاری مەسرور بارزانی، سەرۆکی ئەنجومەنی وەزیرانی هەرێمی کوردستان جێبەجێكراوە و بە شێوەی دیجیتاڵی دەبێت، یەكەم مۆڵەتیش درا بە خوودی مەسرور بارزانی.
دەقی گۆڕانکارییەکانی مۆڵەتی شۆفێری بەپێی نووسراوی بەڕێوەبەرایەتیی گشتیی هاتوچۆی هەرێم:-
1- جۆری A: هەڵگر دەتوانێت ماتۆڕسکیل لێبخوڕێت و نابێت تەمەنی لە 16 ساڵ کەمتربێت.
2- جۆری B: هەڵگر دەتوانێت شۆفێریی ئۆتۆمبێلی ساڵۆن بکات و 18 ساڵ کەمترنەبێت.
3- جۆری BE: هەڵگر دەتوانێت ئۆتۆمبێل بە عەرەبانەوە لێبخوڕێت و پێویستە 18 ساڵی تەواوکردبێت.
4- جۆری C1: هەڵگر دەتوانێت ئۆتۆمبێلی گەورە لێبخوڕێت و 20 ساڵی تەواوکردبێت و پێویستە مۆڵەتی جۆری Bی هەبێت.
5- جۆری C1E: دەبێت هەڵگری مۆڵەتی C1 بێت و تەمەنی لە 20 ساڵ کەمترنەبێت، هەڵگر دەتوانێت ئۆتۆمبێلی بە عەرەبانە یان نیمچە عەرەبانە لێبخوڕێت.
6- جۆری C: هەڵگر دەبێت مۆڵەتی Bی هەبێت و 20 ساڵی تەواوکردبێت.
7- جۆری CE: هەڵگر دەتوانێت شۆفێریی ئۆتۆمبێلی دوو پارچە (قاتیرە و مەقتوورە) بکات و دەبێت 20 ساڵی تەواوکردبێت و هەڵگری مۆڵەتی جۆری C بێت.
8- جۆری D1: هەڵگر دەتوانێت شۆفێریی پاسی 16 سەرنشین بکات و دەبێت 20 ساڵی تەواوکردبێت.
9- جۆری D1E: هەڵگر دەتوانێت شۆفێریی پاس و ڕاکێشانی عەرەبانەیەک بکات.
10- جۆری D: هەڵگر دەتوانێت هەموو جۆرە ئۆتۆمبێلێک لێبخوڕێت، پێویستە تەمەنی 20 ساڵ بێت.
11- جۆری DE: هەڵگر دەتوانێت هەموو جۆرە ئۆتۆمبێلێک بە عەرەبانەوە لێبخوڕێت، پێویستە تەمەنی 20 ساڵ بێت.
12- جۆری T: هەڵگر دەتوانێت شۆفێریی ئۆتۆمبێلی کشتوکاڵی و بیناسازی بکات، دەبێت 18 ساڵی تەواوکردبێت.
