پۆلیسی سلێمانی دەستگیركردنی تۆمەتبارێك ڕادەگەیەنێت و دەڵێت، لەڕێگەی وەرگرتنی خانوو و ئۆتۆمبێل، پارەی لە چەند هاوڵاتییەك وەرگرتووە.
بەڕێوەبەرایەتیی پۆلیسی پارێزگای سلێمانی ڕایگەیاند، دوای ئەوەی سكاڵا لەسەر تۆمەتبارێك تۆماركرا بەوەی فێڵی كردووە و لەڕێگەی وەرگرتنی خانوو و ئۆتۆمبێل، پارەی لە چەند هاوڵاتییەك وەرگرتووە، هێزەكانی بنكەی پۆلیسی بەختیاری لێكۆڵینەوەكانی دەستپێكرد و دوای گەڕان و بەدواداچوون توانرا تۆمەتبار بدۆزرێتەوە و دەستگیربكرێت.
لەئێستادا تۆمەتبار (ف.ف.ت. لەدایكبووی 1985) بە بڕیاری دادوەر ڕاگیراوە و لێكۆڵینەوە لەگەڵیدا بەردەوامە.
پۆلیسی سلێمانی ڕوونیشیكردەوە، تۆمەتبار سێ فەرمانی گرتنی لە بنكەی پۆلیسی بەختیاری، یەك فەرمانی گرتن لە بنكەی پۆلیسی ڕزگاری و فەرمانێكی گرتنی لە پۆلیسی هەولێریش هەیە.
