ژنێك بە هاوكاریی پیاوێك، منداڵە ساواكەی خۆی ڕفاندووە و لە بەرامبەر ئازادكردنیدا داوای پارەی لە هاوسەرەكەی كردووە، هەردوو ڕفێنەرەكە دەستگیركران و منداڵەكە ڕادەستی باوكی كرایەوە.
لە كۆنگرەیەكی ڕۆژنامەوانیدا كە كەمێك لەمەوبەر بەڕێوەچوو، بەرزان عوسمان وتەبێژی بەڕێوەبەرایەتیی پۆلیسی هەڵەبجە ڕایگەیاند، منداڵەكە لە فەلوجە ڕفێندراوە و لە سەیرانگای ئەحمەد ئاوا فڕێدرابوو، دایكی و پیاوێك منداڵەكەیان ڕفاندبوو، دواتر هەردووكیان لە لایەن پۆلیسی هەڵەبجەوە دەستگیركراون.
منداڵەكە تەمەنی 18 مانگە، دایك و باوكی ناكۆكییان هەبووە و مەبەست لە ڕفاندنی، وەرگرتنی پارە بووە لە باوكەكە بەرامبەر بە ئازادكردنی منداڵەكەی، بەڵام بەهۆی دەستەبەرنەبوونی پارەكەوە ڕفێنەران منداڵەكەیان لە سەیرانگای ئەحمەدئاوا فڕێداوە.
وتەبێژی بەڕێوەبەرایەتیی پۆلیسی هەڵەبجە ئاشكرایكرد، دوو ڕفێنەرەكە دەستگیركراون و باوكی منداڵەكە گەیشتووەتە هەرێمی كوردستان و منداڵەكەی ڕادەستكراوەتەوە، ڕفێنەرەكانیش ڕادەستی پۆلیسی فەلوجە دەكرێنەوە بە مەبەستی دادگاییكردن، بەڵام باوكی منداڵەكە سكاڵاكەی دژی هاوژینەكەی كە یەكێكە لە ڕفێنەران كشاندووەتەوە و سكاڵای سەر تۆمەتباری دووەم بەردەوامە.
